30 Pherekhong 2025 ka Limpho Sello

Mosebetsi oa basebetsi ba bophelo ba 1,500 ba Lesotho o tlokotsing ka lebaka la liqeto tsa mobusi oa Amerika, Donald Trump.

Sena se latela phatlalatso ea Lekala la Bophelo e entsoeng ka la 30 Pherekhong 2025. Phatlalatso e hlalosoa hore basebetsi bana, bao har’a bona ho kenyeletsang lingaka, baooki, litsebi tsa lipalo-palo, bahlahlobi ba maro a mali, batsoaki ba litlhare le bahlabolli, ba anngoe ke boemo bona.

“Karolo e ngoe ea basebeletsi ba fag ka tšebeletso tsena, ba 1500, ba anngoe ke boemo bona,” ho rialo phatlalatso.

Lekala le hlalositse hore ‘muso oa Amerika o tšehetsa litšebeletso tse kang:

• Thibelo le phekolo ea lefuba,
• HIV/AIDS le mafu a mang,
• Litšebeletso tse amanang le tsona tse kang thibelo ea phetisetso ea HIV ho tloha ho ‘mè ho ea ho lesea, tlhahlobo ea maro a ‘mele le mali, le tlhabollo.

Leha ho le joalo, Lekala la Bophelo le tiisitse hore Basotho ba 240,152 ba sebelisang litlhare tsa bophelo bohle (ARVs) ha ba na ho angoa ho khinoa hoa lithuso tsa ‘muso oa Amerika.

Sena ke hoba boholo ba litlhare tsena (83 percent) bo rekoa ke ‘muso oa Lesotho, ha tse ling (17 percent li tšehetsoa ke Global Fund.

Ho sa le joalo, Lekala la Bophelo le laetse baokameli ba litsi tsa bophelo literekeng tsohle ho khutlisa basebetsi ba matsatsing a phomolo hang-hang. Hape, le se le qalile lipuisano le ba anngoeng ke boemo bona ho fumana mekhoa ea ho tsoela pele ka litšebeletso.

“Baithuti ba selemong sa bona sa ho qetella le ho fereha bohle ba seng ba phethetse lithuto tsa bona ho ithaopa litsing tseo ba leng haufi le tsona,” ho rialo Lekala la Bophelo.