21 Pulungoana 2024 ka Limpho Sello

Nakong ena eo Lesotho le tobaneng le qholotso e kholo ea mafu a basali le bana nakong ea pelehi, letona la bophelo Selibe Mochoboroane o tla thakhola sethala sa boithuto (Learning Hub) kajeno sepetleleng sa Sehopotso sa Mofumahali Mamohato.

Sethala sena sa boithuto ke moo baoki batlang ho ikoetlisa le ho ikhopotsa malebela ao ba a hlokang ho thibela le ho theola sekhahla sa mafu nakong ea pelehi. Lesotho le hlaha borarong linaheng tse ka holimo-limo tse tlalehang mafu a mangata nako ea peli Afrika mona.

“Lesotho le bopile maano le meralo ea tšebetso e arabelang boitlamo bo naha e boetseng machabeng ho felisa le ho theola sekhahla sa mafu nakong ea pelehi,” ho rialo mookameli oa litšebeletso (Director General Health Services), Dr. Makhoase Ranyali.

“Lekala la Bophelo, ka thuso ea UNICEF, le thehile setsi sa boithuto Sepetleleng sa Sehopotso sa Mofumahali Mamohato (QMMH) hammoho le litsi tsa thuto tse nang le boiketsiso (simulation centres) literekeng tse hlano tsa Berea, Leribe, Maseru, Mafeteng le Mohale’s Hoek. Morero ke hore litsi tsena li anetse litsebo ho baoki, le hona ho sebetsana le tsela eo baoki ba itšoarang ka eona.”

Sethala sa boithuto sa sepetlele sa Sehopotso sa Mofumahali Mamohato se tla buloa ka molao kajeno, 21 Pulungoana 2024. Thakholo ena e etsoa ka letsatsi leo Lesotho le ketekang letsatsi la machaba la ho hlaha pele ho nako (Premature Birth). Mosebetsi ona otla tsoela pele moo, hara tse ling, ho lebeletsoeng hore ho be le papiso (simulation) ea ho hlokomela ngoana ea hlahileng pele ho nako ea hae.