8 Pulungoana 2024 ka Monyane Khau

Ke batho ba 1, 383 bao e bileng mahlatsipa a peto ka selemo sa 2022, ho latela tlaleho ea Lefapha la Naha la Lipalo-palo (Bureau of Statistics).

Tlaleho e senola hore palo ena ea litlolo tsa molao oa tšireletso khahlanong le tlhekefetso ka motabo e beha tlolo ena e le e ‘ngoe ea litlolo tsa molao tse tharo tse holimo-holimo Lesotho.

“Joalokaha ho bontšitsoe, kakaretso ea linyeoe tse 11,939 tsa litlolo tsa molao tse tebileng e tlalehiloe ka 2022,” ho rialo tlaleho ea Lefapha la Naha la Lipalo-palo.

“Ho qheketsoa hoa matlo ho ka holimo-limo ka 36.9 peresente, ho lateloa ke bosholu ba liphoofolo le tlolo ea molao oa thobalano ka liperesente tsa 18.3 le 11.6 ka ho latellana. Khoebisano ka batho e tlalehile karolo e nyane ka ho fetisisa ka liperesente tsa 0.2.”

Tlaleho ena e bontša hore Maseru e ka teropong e na le palo e phahameng ka ho fetisisa ea litlaleho tsa tlolo ea molao oa tšireletso khahlanong le tlhekefetso ka motabo. Lipalo li senola hore batho ba 328 ba tlalehile tlhekefetso ka motabo Maseru e ka teropong.

E lateloa ke batho ba 186 Maseru e ka ntle ho teropo, ha Leribe e le maemong a boraro ka palo ea 167. Setereke sa Quthing sona se kutung, ka palo e tlase ka ho fetisisa ea 60 bakeng sa litlolo tsa molao oa tšireletso khahlanong le tlhekefetso ka motabo.

Le hoja tlaleho ena e sa bontše botho ba batho ba 1,383 bao ebileng mahlatsipa a tlolo ena ea molao, liphuputso li bontša hore mosali a le mong ho ba supileng ba lilemo tse 18 le ho feta o kile a hlekefetsoa ka motabo nakong ea bo-ngoana ba hae Lesotho. Ha papisong le banna ba lilemo tse tšoanang, e le monna a le mong ho ba 20 a kile a hlekefetsoa ka motabo nakong ea bo-ngoana ba hae.

Sena se bontša hore basali ba tlokotsing e phahameng ea ho hlekefetsoa ha ho bapisoa le banna, bao menyetla ea bona ea ho qoba tlhekefetso e bonahalang e fokola.

*Mamela litaba tsa Moliehi, mosali ea ileng a betoa ke banna a le mosebetsing, mona: https://www.uncensored.org.za/moliehi-o-pheta-masisapelo-a-peto/