25 Mphalane 2024, ka Pascalinah Kabi

Kamora hore ‘Malebeoana Alice Ranku a hlokahalle sepetleleng sa Ntšekhe, Mohale’s Hoek, mooki o belaelloa a ile a bolella lelapa la Ranku hore ha a tlela ho thibela batho ho shoa sepetlele moo.

“Nne ntse le mo tlisetsang mona ha eka lea lla tjee lea nyofela tjee, nne le mo tlisetsang mona?” ho rialo molekane oa mofu, Nkesi Ranku.

Pelaelo ke hore sena mooki o se buile nakong eo lelapa le neng le batla likarabo ka pelaelo ea hore sepetlele se ile sa tšoara litaba tsa mofu ka bohlasoa, ‘me sena se ile sa lebisa lefung la hae ka la 22 Loetse, 2024.

Lekala la Bophelo le re le thakhotse liphuputso tsa ketsahalo ena. Ho sa le joalo, lelapa la Ranku le tlaleha hore ‘Malebeoana, ea hlokahalang a le lilemo li 62, o ile a amoheloa sepetlele Ntšekhe ka la 18 Loetse 2024, moo a ileng a fuoa drip e ileng ea fela. Lelapa le re drip ena ha ea ka ea ntšuoa kapa ho eketsoa ho fihlela a hlokahala ka la 22 Loetse, 2024.

Lelapa lena le boetse le qosa sepetlele sa Ntšekhe ka ho se fe mokuli litlhare ho tloha ka la 19 Loetse, ho fihlela a hlokahala ka la 22 Loetse, 2024. Malebeoana o tlalehoa a hlokahalletse matsohong a morali oa hae ka 6:30 hoseng, ‘me mooki a tla fihla ka 7:30 hoseng, a kototsoa moo a lulang ka ha a ne a sa fumanehe ka hara sepetlele.

“Mooki o fihlile a botsa na ho etsahalang, eaba morali oa mofu o re ke tlameha ho botsa uena na ho etsahalang. Ke moo mooki a ileng a re, ‘’na ha ke tlo thibela batho ho shoa,’” ho rialo Ranku puisanong le Uncensored News ka la 10 October 2024.

Mooki enoa o tlalehoa a hanne ho fana ka mabitso a hae, kaha a ile a re lelapa la Ranku le tla mo senyetsa mosebetsi ha a ka fana ka mabitso a hae. “Ha ke tlo u fa lebitso la ka; u batla ho nsenyetsa mosebetsi?”

Pelaelo ke hore mooki o ne a lumela hore lelapa la Ranku le tla sebelisa mabitso a hae ho mo tlaleha ho bookameli, ‘me ho nkuoe likhato khahlanong le eena.

Eka mofu o hlokahetse matsatsi a mabeli ka mora hore sepetlele se hane ho molokollela lelapa ka la 21 Loetse 2024. Lelapa la Ranku le qosa sepetlele ka hore se ile sa re mokuli a ka lokolloa feela ka tumello ea ngaka. Ke moo lelapa le ileng la batla ho bona ngaka, empa la bolelloa hore ngaka e joalo e tla fumaneha ka la 23 Loetse 2024, ka 9:00 hoseng.

Imamelle Nkesi Ranku mona:

Ho sa le joalo, Ofisiri ea liphatlalatso ea Lekala la Bophelo, ‘Mateboho Mosebekoa, o bolelletse Uncensored News hore lekala le thakhotse liphuputso ka litaba tsena.

“Lipatlisiso li ntse li tsoela-pele, ‘me tlaleho ea ketsahalo e ntse e bokelletsoa,” ho rialo Mosebekoa ka la 24 October 2024.