20 Pulungoana 2024 ka Monyane Khau

Tlali Kolobe, eo e neng e le mooki Mabote Filter Clinic, a ke ke a hlola a sebetsa e le mooki bophelo bohle ba hae ka mora ho fumanoa a le molato oa ho beta mokuli setsing se tšoanang.

Sena se tla ka mora hore Lekhotla la Booki Lesotho le hlakole Kolobe lenaneng la booki ka mora ho fumanoa a le molato oa ho beta mokhachane setsing Mabote Filter Clinic lilemong tsa ho feta.

Mongoli oa Lekhotla la Booki Lesotho, Flavia Moetsane, o re Kolobe o ile a beta mokhachane nakong eo a neng a mohlahloba Mabote Filter Clinic.

Litšebeletso tsa bokhachane li kenyelletsa ho hlahlojoa ka botšehaling ka hore mokhachane a kakalle, a bule lirope, ebe mooki kapa ngaka o tla sheba hore na tsohle li ntse li le hantle ka botšehaling ba mokhachane. Kolobe o fumanoe a le molato oa ho beta mokhachane nakong eo a neng a mohlahloba.

Imamelle Flavia Moetsane ha a hlalosa na Tlali Kolobe o ile a beta mokhachane enoa joang:

Ho sa le joalo, Pholo Churhill Lepheane o amohiloe lengolo la booki lilemo tse hlano ka mora ho hloleha ho qoba likamano tsa thobalano lipakeng tsa hae le mokuli.

Flavia Moetsane oa hlalosa:

Ka ho le leng, Moetsane o hlalosa ha Pontšo Matsepe, Relebohile Poqa le Mponeng Raphael ba hlakotsoe lenaneng la booki ka mora ho fumanoa ba le molato oa ho sebetsa e le baoki ka ntle ho mangolo a nepahetseng a sekolo. Sena se bolela hore Matsepe, Poqa le Raphael ba ke ke ba hlola ba sebetsa e le baoki bophelong bohle ba bona.

Sena se tla ka mora hore boraro bona bo sebelise mangolo a bokungata a sehlopha sa bohlano ho kena le ho ithutela booki Maluti Adventist College le Paray School of Nursing.

Flavia o boetse oa hlalosa: