27 Pulungoana 2024 ka Monyane Khau

Moahloli e Moholo, Sakoane Sakoane, o lahletse matjoing nyeoe eo ho eona sechaba sa Mokhotlong se neng se kopa lekhotla ho qobella morafo oa Letšeng ho lefa motho ka mong M2, 500. 

Balli ba ne ba qosa morafo oa Letšeng ka ho tsoa tlaase tumellano ea molomo, eo ba reng morafo o ile oa ba tšepiso ho lefa motho ka mong M2, 500 ka khoeli ha ba qala mosebetsi ka 2012. Balli ba qetetse ho sebetsa ka 2020. Morafo o ne o nehile balli thepa eo ka eona ba neng ba tla thusa sechaba le morafo ho arabela maemo a tšoanyetso tikolohong ea Pae-lea-Itlhatsoa, Mokhotlong.

Kutloisiso ea balli e bile hore ka phano eo ea thepa, morafo o ba file mosebetsi oo ba tlameha ho o kholla M2, 500 ka khoeli, motho ka mong. Ka ho le leng, morafo o ile oa hanana le kopo ea mokholo oa khoeli le khoeli, oa fa balli monyetla oa ho iketsetsa chelete ka ho lefisa sechaba sa Pae-lea-Itlhatsoa ho nyolla mashala a mehala ea thekeng ba sebelisa thepa ea morafo.

Moahloli Sakoane o lahletse kopo ea sechaba sena matjoing ka la 4 Motšeanong, 2024

“Balli kaofela ba lumetse ho sebetsa ele baarabeli ba tšoanyetso ka tšutsumetso ea moikarabelli. Kopo ea hore balli ba patalloe mosebetsi ona e entsoe likopanong tse bileng teng lipakeng tsa bona le basebetsi ba moikarabelli. Basebetsi ba moikarabelli ba ile ba supa hore ba tla teka kopo ena ho beng ba bona.

“Kopo ena ha ea ka ea amoheloa, morafo o ile oa tla ka leoa la hore balli ba iketsetse chelete ka ho patalisa sechaba sa moo ho nyolla matla a mashala (charge) a mehala ea thekeng thepeng ea morafo. Balli ha ba ea ka ba thabela taba ena,” ho rialo kahlolo ea moahloli Sakoane.

Moahloli Sakoane o re le hoja balli ba ne ba sa thabela qeto ea morafo ea selemo sa 2012, ba ile ba itsoella-pele ho sebetsa ho fihlela ka selemo sa 2020, ha morafo o tsekisa balli thepa ea ona ea ho arabela tlokotsi.

“Le hoja balli ba lumela kapa ba nahanne hore kopo ea bona ea mokholo e lumetsoe, bopaki bo ka holimo bo bontša hore tumelo ea bona ha ena motheo,” ho rialo moahloli Sakoane.

“Ha ho le joalo hee, moikarabelli o lokolohile qosong ena,” ho rialo moahloli Sakoane, a bile a re balli ba lefe litjeo tsa leqhoetha la morafo oa Letšeng.

Balli nyeoeng ena ke Maluti Community Development Forum, Lentsoete Mohai, ‘Mamoalosi Ntsiki, Sephapo Moletsane, Mapontšo Lematla, Ntaoleng Mporo, ‘Malulang Lematla le ‘Marethabile Motokoa.

Maluti Development Community Forum, mokhatlo oa loanelang litokelo tsa sechaba se angoeng ke merafo, o ile oa ikhula nyeoeng ena pela e mameloa ke moahloli Sakoane ka la 13 le 14 Hlakubela 2024.

Pae-lea-Itlhatsoa e lutse tlasa morafo oa Letšeng. Morafo o fane ka thepa ea tlokotsi eo sechaba se tlang ho e sebelisa nakong ea maemo a tšoanyetso, a nyelletsang ho phahloa hoa letamo la morafo.